प्रश्न पडतो….

कपडे वस्तू, गोष्टी, जसे माणूस बदलतो तितक्याच सहजतेने आयुष्य बदलता आल असत तर खूप छान झालं असत नाही का! एखादा कपडा एखादी चप्पल लहान मोठी झाली आपण बदलून घेऊ शकतो, त्या कपड्याचा रंग नाही आवडल आपण बदलून घेऊ शकतो, पण जर कुणाला आयुष्य बदलून दुसर मिळवायचं असेल तर कोणत्या बाजारात जावं लागेल प्रश्न पडतो कधी.  कामावरून सुट्टी मिळवू शकतो, वस्तू खरेदीवर सुट मिळवू शकतो, देह थकल्यास विश्रांती घेऊ शकतो, वय झालंय रिटायरमेंट घेऊ शकतो पण आयुष्याच्या पाठी ओझं ओढत पुढे घेऊन जाणारं आयुष्य आपण थांबवू शकतो का प्रश्न पडतो. आज मला नाही जगायचं आज मी सुट्टीवर आहे, रोज रोज काय श्वास घेणं, जेवण, तेच काम तेच झोपणं तेच श्वास आणि तीच हवा, आपण या पासून एक दिवस सुटका नाही का मिळवू शकत.  कामावरून सुट्टी हवी असेल तर बॉस ला विचारतो  आयुष्यातून एक दिवस रजा हवी असेल तर कोणत्या साहेबाला भेटाव लागेल, आणि देव जर तो साहेब असेल तर इतक्या जाती इतकी धर्म कोणत्या देवाला कोणत्या साहेबांकडून सुट्टी मिळेल किंवा मागावी प्रश्न पडतो. घर बनवण्यासाठी घर सोडतो, पोट भरण्यासाठी भुके मरतो, शिक्षण घेण्यासाठी पैसे जमवायचे असतील तर शाळा बुडवून आधी काम करावं लागत.जगण्यासाठी मरतो, स्वप्नासाठी मरतो, व्यक्तीसाठी, प्रेमासाठी, पैशासाठी, मरतो, इच्छामरण, शोषण, अत्याचार, भूक दारिद्र्य या पलीकडे आयुष्य आहे की हेच आयुष्य प्रश्न पडतो.  सकाळ आशेला जन्म देते, मेहनत त्याचा सांभाळ करते  आणि निराशा रातीला मृत्युदंड देते हेच का आयुष्याचं सार प्रश्न पडतो